2Cor 1 | BEF | STEP | Poluita nani Yesu Kilisitohi aposolo nele'mo ho ti'ehinamofita to bo mone lalalutifu hiti moneka nohutoti'a Koliti hepatoga Hu'mamofihi bona'a to Giliki melugu mine'ahana'a hiti asaga'i mineme bite ete hi'ahana lenali fayahi ya'ma koyo nolepito ma luto nolube.

2 Corinthians 1

1 Poluita nani Yesu Kilisitohi aposolo nele'mo ho ti'ehinamofita to bo mone lalalutifu hiti moneka nohutoti'a Koliti hepatoga Hu'mamofihi bona'a to Giliki melugu mine'ahana'a hiti asaga'i mineme bite ete hi'ahana lenali fayahi ya'ma koyo nolepito ma luto nolube.

2 Afotifu Hu'ma to Sipi Boti Kilisitohi aitogati lenehe'mose'na'a to fuluna'auba ya'ma lenalitoga mino moloto mineno.

Polu gelo bise'namofihi gupisalo mino moloto minoto Hu'mamofihi fokehi li'ehina

3 Sipi Boti Yesu Kilisitohi ai afo'afihi Hu'mamofihi fokehi lilune. Ai fulunamofihi afotifu to lele'mo fulu hulata afotifu nohibe. 4 Ai keke'i luse'namofihi hapa'a fato fato'i huto nohigo lele'mo bati hulata nohibe. Ya huto Hu'mau lele'mo bati hulata nohina yamofihi lali ana huto lalalutigihi luga'a keke'i luse'namofihi enugupisa'anilo huto nohinogomo enele'mo fulu hiluta nasana ni'ibe. 5 To Kilisitohi gupisa'alo keke'i luse'na samahi tito anamofihi nekisa'a mone lalitoga hulata nohibe. Ana suhi huto Kilisitohi lehe'mose'na'a ya'ma lalitoga napa huto li huto hulata nohibe. 6 Lalitoga keke'i luse'na huto hulata nohina ya'ma lenalitoga fuluna huto hilibe luto to lenele'mo bati hilibe luto huto hu limilata nohibe. To fuluna'a ya'ma lalitoga huto hu limilata nohina ya'ma lenali kumu yabe luto huto hu limilata nohinagihe. To fuluna'auba lenalitoga mino moloto fi hetofa nohu lepelenogo keke'i luse'na lalitoga huto hulata nohina ana suhi huto lenalitoga huto nohinogomo fi siti bite minete lilabe luto ni'ibe. 7 To lali lenali kumu lifita ilata nohuta ya'ma ule'ale nohigo ma luto kehelilata nohune. Lali keke'i luse'na lilata nohuta ya'ma lenali hiti keke'i luse'na kehelite nehite fulunamofihi ketipa'a lali lilata nohutana lenali ana hite lilabe.

8 Lalalutigitabe, Esia metoga nohuto keke'i luse'namofihi lu gupisalo minomo ti'ehinamo ni'ibe. Ya'mu lenegekesu ho lalibe luto lilube kehelilo. Mone kegi'a ya'ma keta'a hiti nasana goli'a hiti nasanauba lugupisalo tiloto lele'mo ho kalina'a nohigo molo emito minalupi fililupi luto mone mekeheli'ohutamo ni'ibe. 9 To ya'ma fililatanamofihi ka'a nolune luto komopati kotinifa gi'ehina yanauba ya hu'ehinaya mone huto hu melimi'ehinamo ni'ibe. Lali amuya'amu kehelutogo limo ito fa'menena lolo hulenogo Hu'mau filise'naguti lele'mo ho tilata bomofihi ai amuya'amu kehelutogo minalune luto ya'ma nasana huto hu limi'ehinamo ni'ibe. 10 To ai'a ya'ma filise'namu lubuto bi'ehina ya hulago yanauba minoto aku'i haka ho molo letalube'mu hibe. Ya'ma hu letoba letoba huto ya'ma ka'a keheliya ito nohuto aitoga lifita'i molo'ohune. 11 To lenali Hu'mamofitoga lilana yanauba bati nohigo Hu'mamofihi ai'a komopa'a lamana huto yabe luto nolu etenogo lito lubuto bilenogo bona'a asaga'magihi enabagaguti lali kumu Hu'mamofihi fokehi hete enegelo bite minalabe.

Polu Koliti bonatoga bilube'mu nohuto fato suhi lolo hu'ehina hapa'a

12 Laliti'mu kehelutogo nesi'a tilata nohina. Ya'ma ya hu'ohuto'mu komopati lusiga noluto to lama'nakagu ya'ma metoga nohutogo komopatiuba nasana mone kumu li fitu falina'a meni'ibe. Lali Hu'mamofihi ka mekeheli'ahana bona'i enali enubulo ya suhi huto minoto mono ka kehelilata nehana bona'i lenali lenubulo bati huto minolata nohune. To lali metoga bona'magi kehelilata nehanalo amuya moloto bati huto mino'ohuta meni'ibe. Hu'mau lele'mago ai amuya'alo bati huto minolata nohune. 13 Nani kaga'ni faga faga hiti menolube. Kaga hapa lapa'a mone fala menokube. Fayahi koyoto lepilenogo'ni leka sete keheliya ilabe luto koyolata nohube, luto akeheli'ohube. To luga'a lenali mele'isi nani hapa'ni akeheli fe li'ahana suhi hite lenali aliha'a keheli fe lite su halabe luto nokehelube. Ya hilenogo lenali kumu nani kehelugo tilata nohina ya suhi hite lenali Sipi Bo Yesuhi ya'ma kana napa'alo nani kumu kehelinogo tilibe.

15 Kaga ya luto noluna ya'ma keheliya i'ohuto lili'na kana loe yupahi lenalitoga biluna nasanauba komopatinigu bati hilibe luto le'mo babahi hu'ohuna. 16 Buto bu lenogoloto Masetonia metoga buto minoloto aku'i i behe huto oto lenalitoga nehetinogo nele'mo kohe tete kapogu molo netenogo Yutia metoga bilufihe luto keheli'ohuna yabe. 17 To nani ma luto lugo keta mehuse huto fato'mofihi hu'ehinamo yabe lite nelafihe, ya? To nani ya'ma bona'i Hu'mamofihi ka mekeheli'ahana enali tegi huto ya'ma lilube luto lu'ohuna kana'a nabaga'nitu moneko'i o'yo lilube to komopa'nigu o'e lilufihe luto lu'ohuna ya'ma futu'a lolo mehilifihe? 18 Hu'ma ai lamana'amofihi afo'afita nohigo nani kele kele pana'a nohunamofita henabe luto moneko kumu o'yo luto to o'e luto lilube? 19 Hu'mamofihi pana'a Yesu Kilisito ai hapa'a ya'ma nani hiti to Silasi to Timoti lali lu lepi'ohuta bo ai ya'ma kaga lu'ehina luga'a o'yo luto nohigo luga'a futu'a lolo huto o'e luto faga lilata menohibe. Asaga'i ya'ma lama'naka'a lu'ehinaloti legeya'ago ho baga ilata nohibe. 20 Hu'mau lu limi'ehina ka'a fato fato'mofihi ya'ma ai'a kago legeya'a holata nohibe. Yana'mu ya'ma Hu'mamofihi fayaha'a mino baga ito nominabe, luto Yesu yabe luto lama'naka luto Hu'mamofihi fokehi lulata nohune. 21 Hu'mamofitinifu lenali hiti Kilisitotoga lele'mo malago minoba minoba hilutamo ni'ibe. To Hu'mamofitinifu ya'ma ai'a lili'nalo lele'mo eto hu'ehinamo ni'ibe. 22 To ai'a bona'a minalune luto komopatigu keya'a molo leto'ehinamo ni'ibe. Ai aliha'a lele'mo laga hina huto mino baga ilinamofihi babeyafa'a lolo huto ya'ma ai Sikalafu'a komopatigu molo letago mino'ehinamo ni'ibe.

23 To naniya lenalitoga mebu'ohuna hapa'a ma huto ni'ibe. Nani Koliti metoga buto ka lepekito lenele'mo sibina hu lalube luto kehelugo keheli'ohuna keta nebesigo mebu'ohunamo ni'ibe. Kaga ya'ma komopa'nigu bu nogoloto nohina bo Hu'mau keheligo bati higo lu nolepube. 24 To lenali keheliya ise'natinimofihi amuya melete nehabe, ya'ma keheli'ohutamo ni'inaya lenalitoga buto nani kibina bo lolo hilube luto mone melu'ohube. Fa'mene lenalitoga komopatinigu enegelo bilibe luto lenele'mo bati huto foya'a lilata nohube.